DOMO LANGU: KIKWETE

RAIS KIKWETE AELEZA ALIVYOOMBEWA DUA NA WAISLAMU ILI AFE.....

Posted by Bigie habari za kitaifa, KIKWETE 2:32 AM

RAIS wa Jamhuri ya Muungano wa Tanzania, Jakaya Mrisho Kikwete ‘JK’ amelilipua kundi dogo la Waislam waliowahi kumsomea Itikafu ili yeye na viongozi wawili wa serikali wafe kwa kile kilichodaiwa na kundi hilo kwamba, wamekuwa wakiiangamiza dini yao.

Rais Jakaya Mrisho Kikwete.

Hayo yalisemwa na JK mwenyewe katika hotuba aliyoitoa ikulu Machi 31, 2013 ambayo ni utaratibu aliojiwekea wa kuwahutubia Watanzania kila mwisho wa mwezi.

JK alikuwa akijibu tuhuma zinazoelekezwa kwake kutoka pande zote za dini ya Kiislam na Kikristo kwamba amekuwa akipendelea upande mwingine.

Akizungumza bila kumung’unya maneno lakini katika hali iliyoonesha kusikitishwa na madai hayo, JK alisema:
“Ndugu wananchi, nyaraka na kauli kalikali zinazotolewa na viongozi wa dini za Kikristo na Kiislam zinanishawishi kuamini haya niyasemayo. Nyaraka na kauli hizo zina mambo mawili makuu.

“Kwanza, kwamba kila upande unatuhumu, kushutumu na kulaumu upande mwingine kwa kufanya vitendo viovu dhidi ya dini yake. Kauli na mihadhara ya kudhalilisha dini za wengine, kunajisi vitabu vitakatifu, kuchoma moto nyumba za ibada, mzozo kuhusu nani achinje na kuuawa kwa viongozi wa dini ni baadhi ya mambo yanayotolewa mifano.

“Na pili kwamba, kila upande unailaumu serikali kwa kupendelea upande mwingine. Wakristo wanalaumu kwamba mihadhara ya kudhalilisha Ukristo inaendeshwa na serikali haichukui hatua. Aidha, Wakristo wanateswa na viongozi wao kuuawa na Waislam lakini serikali haichukui hatua.

“Kwa ajili hiyo wanadai kuwa serikali imeshindwa kulinda uhai wa raia wake. Wanasema pia kwamba serikali inapendelea upande wa Waislam.

“Waislam nao wanadai kuwa kitabu chao kitakatifu, yaani Quran Tukufu, kinadhalilishwa kwa kuchanwa, kuchomwa moto na kukojolewa na Wakristo na serikali haichukui hatua yoyote ya maana. Waislam wananyanyaswa katika nchi yao, wanakamatwa hovyo, hawapewi fursa sawa, na kwamba serikali inawapendelea Wakristo.

“Mimi binafsi wananishutumu kuwa napendelea kushiriki zaidi shughuli za Wakristo kuliko za Waislam kama vile harambee za kujenga makanisa na shule za makanisa. Naambiwa kuwa mwepesi kushiriki maziko ya maaskofu kuliko mashehe wanapofariki dunia.

“Ipo misikiti mitatu hapa Dar es Salaam wamenisomea itikafu nife. Katika itikafu hiyo wamewajumuisha Inspekta Jenerali wa Polisi, Said Mwema na Kamanda wa Polisi wa Kanda Maalum ya Dar es Salaam, Kamishna Msaidizi Mwandamizi Ndugu Suleiman Kova.

“Ndugu wananchi, napenda kuwahakikishia Watanzania wenzangu kuwa mimi na serikali ninayoiongoza, hatupendelei upande wowote. Hatufurahishwi na kitendo cha mtu kudhalilisha dini ya mwenzake ndiyo maana wapo wahadhiri wa dini ya Kiislam na wahubiri wa dini ya Kikristo wamekamatwa na kufunguliwa mashtaka kwa nyakati mbalimbali,” alisema JK bila kuitaja misikiti hiyo.

Hata hivyo, kuna madai kwamba, misikiti hiyo, mmoja upo Temeke, miwili ipo Kariakoo ambapo waumini wake wamewahi kukesha kwa ajili ya dua ya Itikafu kwa viongozi hao jambo ambalo rais amekanusha kuangamiza imani yoyote nchini.

"RAIS KIKWETE ANA HASIRA, WANAOSEMA MPOLE HAWAMJUI"...MAMA SALMA

Posted by Bigie habari za kitaifa, KIKWETE 7:38 PM

MJUMBE wa Halmashauri Kuu ya Taifa (NEC) ya CCN, Mke wa Rais Mama Salma Kikwete ametoboa siri kwamba mumewe, Rais Jakaya Kikwete pamoja sura yake kujawa haiba ya ucheshi wa mara kwa mara lakini kwa tabia ana hasira.

Amesema, Rais Kikwete hukasirika sana anapoona au kusikia mtu au mtendaji katika Chama au serikali anafanya mambo ya hovyo au ya kizembe hasa katika masuala ya kazi.

Mama Salma Kikwete ametoboa siri hiyo, leo Februari 18, 2013, kwenye mkutano wa hadhara uliofanyika kwenye kijiji cha Kikwetu Kata ya Mbanja akiwa katika ziara ya kukagua, kuimarisha uhai wa chama, kukagua utekelezaji wa ilani ya Chama na kuwashukuru wana-CCM wa Lindi mjini kwa kumchagua kuwa mjumbe wao wa NEC.

"Siyo kweli kwamba Rais Jakaya Kikwete siyo mkali, japokuwa ana sura yenye haiba ya ucheshi wa mara kwa mara kwa kila mtu, lakini ni ana hasira, tena sana pale mtendaji au mtu yeyote anapombaini kwamba anafanya mambo ya hovyo ay ya kizembe katika kazi za Chama au serikali yake", alisema Mama Salma Kikwete.

Mama Kikwete akitoa ufafanuzi, baada ya mshereheshaji mmoja kwenye mkutano huo, Mwenyekiti wa CCM wa wilaya ya Lindi mjini Muhsin Ismail, kusema kwamba Rais Jakaya Kikwete ni mpole wa kupindukia na kuuliza umati wa wananchi waliokuwa kwenye mkutano huo kwamba je ni nani amewahi kumuona amenuna.

"Natoa ofa kama hapa kuna mtu aliyewahi kumuona mpendwa wetu, Rais Kikwete amenuna anyooshe mkono. Akitokea ntampa sh. elfu moja hapa hapa... Kwa mara ya kwanza, ya pili unaona hakuna", alisema Muhsini.

Wakati akiendelea kusema hivyo, mtu mmoja kwenye mkutano huo alinyoosha mkono, lakini Muhsin akakataa kumpa zawadi yake kama alivyokuwa ameahidi. "Aaa wewe sikupi zawadi", alisema Muhsini lakini papo hapo akakatishwa na Mama Mama Kikwete.

"Hata kama humpi hiyo zawadi, sawa. lakini Siyo kweli kwamba Rais Jakaya Kikwete hakasiriki na siyo mkali. Japokuwa ana sura yenye haiba ya ucheshi wa mara kwa mara kwa kila mtu, lakini ana hasira, tena sana pale mtendaji au mtu yeyote anapombaini kwamba anafanya mambo ya hovyo ay ya kizembe..." alisema Mama Kikwete.

"RAIS KIKWETE AMJIBU LOWASSA TATIZO LA AJIRA NCHINI

Posted by Bigie KIKWETE 3:26 AM

Rais Kikwete ambaye alikuwa akifungua semina ya siku mbili ya Wajumbe wa Halmashauri Kuu ya Taifa (NEC) ya CCM mjini Dodoma jana, alisema kusimama jukwaani na kusema kwamba ajira ni tatizo hakuna maana ikiwa mhusika hatoi pendekezo la jinsi ya kumaliza tatizo hilo.

MWENYEKITI wa Chama Cha Mapinduzi (CCM), Rais Jakaya Kikwete katika hali inayoashiria kumjibu rafiki yake, Edward Lowassa ameponda makada wa chama hicho ambao wamekuwa wakipanda jukwaani kuhubiri kuwa ajira ni tatizo pasipo kupendekeza suluhisho la tatizo hilo.

Rais Kikwete ambaye alikuwa akifungua semina ya siku mbili ya Wajumbe wa Halmashauri Kuu ya Taifa (NEC) ya CCM mjini Dodoma jana, alisema kusimama jukwaani na kusema kwamba ajira ni tatizo hakuna maana ikiwa mhusika hatoi pendekezo la jinsi ya kumaliza tatizo hilo.

Ingawa hakutaja majina ya wanasiasa ambao wamekuwa wakizungumzia suala hilo lakini Lowassa, ambaye alijiuzulu wadhifa wa Waziri Mkuu mwaka 2008, amenukuliwa mara nyingi akiitaka Serikali kuchukua hatua za kukabiliana na tatizo la ajira kwa maneno kwamba ‘ni bomu linalosubiri kulipuka’.

Lowassa, ambaye ni Mbunge wa Monduli kupitia CCM, aliwahi kuingia hata kwenye malumbano makali na Waziri wa Kazi na Ajira, Gaudensia Kabaka.

Kabaka akiwa bungeni mjini Dodoma, Machi 21, 2012 alilazimika kutoa takwimu za namna Serikali ilivyokuwa inatengeneza ajira kwa nia ya kumjibu Lowassa, ambaye alikuwa ameeleza tatizo la ajira linavyowaathiri vijana kwenye moja ya hafla.

Lowassa ameendelea kuzungumzia suala hilo mara kwa mara kila anapopata fursa ya kuhutubia.

“Ndiyo ajira ni tatizo, hapa mkakati ni ajira itapatikana vipi? Ni tatizo kweli, tunafanyaje na tunalitatua vipi? Tunataka mtu anayesema kwamba ni tatizo na apendekeze pia suluhu yake,” alisema Rais Kikwete, ambaye aliwahi kutamka kuwa Lowassa ni rafiki yake na anafahamika kuwa alishirikiana naye katika harakati zake za kuwania urais mwaka 2005, na baadaye akamteua kuwa Waziri Mkuu.

Lowassa, ambaye ni miongoni wa makada wa CCM wanaotajwa kuwania urais mwaka 2015, alikaririwa akisema Oktoba 19, 2011 kuwa; “Sijakutana na Rais Kikwete barabarani, watu waache kunichonganisha naye.” Ilikuwa katika mkutano na waandishi wa habari jimboni kwake Monduli.

Suala la ajira nchini ni moja ya mada zinazotarajiwa kuwasilishwa kisha kujadiliwa katika semina hiyo ya CCM, na Rais Kikwete aliwataka wajumbe kupendekeza jinsi ya kuongeza ajira nchini wakati mjadala husika utakapowadia.

Hata hivyo, Rais Kikwete alisema hivi sasa ajira katika sekta ya umma ni kama hakuna, kwani zimebaki sekta za afya na elimu na kwamba hivi sasa suluhu ni kukuza sekta binafsi ili kuongeza ajira.

Alitoa mfano kwamba wakati yeye alipohitimu kidato cha nne, cha sita na chuo kikuu hakukuwa na tatizo la ajira kwa kuwa idadi ya wasomi ilikuwa ndogo ikilinganishwa na mahitaji ya sasa ya soko hilo.

Kikwete alisema wakati huo Serikali ilikuwa haijajitosheleza, tofauti na sasa ambapo imefikia ukomo wa kuajiri isipokuwa kwa sekta mbili tu.

“Kwa sasa Serikali haina uwezo tena wa kuajiri, ilifika mahali kila kiongozi anaenda kuomba serikalini na kupeleka watu wake, unakuta anatoka Kikwete anaomba mtoto wake aajiriwe, mara Katibu Mkuu naye anapeleka watu wake, ikafika mahali mashirika yakajaa tukapata kazi ya kuwapunguza,” alisema Rais Kikwete.

Rais Kikwete alisema sehemu kubwa ya ajira inatoka katika sekta binafsi na jambo la msingi ni kwa viongozi kushirikiana na Serikali kuona ni kwa jinsi gani wanaweza kuikuza.

“Tutaendelea kuwaita wawekezaji wezi halafu tunataka kukuza ajira? Tunazipataje nafasi zaidi, wakiwekeza wanafanyiwa fujo wasiwekeze,” aliongeza Rais Kikwete, ambaye bila kuingia kwa undani kuhusu fujo lakini wafuatiliaji wa mambo wanaweza kuoanisha kauli hiyo na vurugu zilizotokea hivi karibuni mkoani Mtwara ambako wananchi wanapinga ujenzi wa bomba la gesi kwenda Dar es Salaam.

Maadili ndani ya CCM
Kuhusu maadili, Rais Kikwete alionyesha kukerwa na baadhi ya viongozi wa chama hicho kutumia majukwaa kukosoa uongozi uliopo na kusahau majukumu yao kama viongozi.
“Hakuna haja ya viongozi kuwa mahodari wa kuongea kama kuna matatizo. Tatueni matatizo huko yakiwashinda tuleteeni ngazi ya juu,” alionya Rais Kikwete.

Kikwete pia alionyeshwa kukerwa na baadhi ya viongozi wenye maadili mabovu huku akitoa mfano wa viongozi wanaolewa ovyo na kukopakopa fedha kwa watu.

“Yapo mambo ambayo lazima tuyazungumze vizuri, huwezi kuwa mwenyekiti kazi yako ni kukopakopa tu, halafu unalewa hadi unakuwa wa mwisho baa. Unamalizia pombe zako kwa kusema Kidumu Chama Cha Mapinduzi.

“Unajenga taswira gani ya kwako na chama chako.
Ukishakuwa kiongozi unabeba dhamana kubwa ya chama chako, matokeo yake taswira ya chama mbele za watu inakuwa chama cha walevi.

Kamati Kuu siri
Rais Kikwete pia aliwatahadharisha wajumbe wa Halmashauri Kuu ya Taifa, kuwa hakuna mtu anayejua orodha ya wajumbe watakaoteuliwa katika Kamati Kuu (CC) zaidi yake.

“Niwatahadharishe tu kwamba asiwadanganye mtu kwamba orodha ndiyo hii au hawa ndiyo watakaochaguliwa. Anapoteza muda wake tu kwani kama alikuwa anakunywa pombe mwongezee chupa nyingine ili aondoke.

“Orodha haijatengenezwa, Rais amefika leo (jana) asubuhi, Makamu Mweyekiti naye amefika leo (jana) tutakaa sasa na kesho wala msiamke kwa kufikiria usiku huu mtapata orodha. Msisumbuke kufanya mikutano ya kuunga mkono watu wenu kwani orodha hiyo wala haina fulani. Nimesikia kuna watu wanasambaza orodha zao, nashangaa kuna wajumbe wa NEC, ambao ni hatari kwa chama chetu.”

Kikwete aliwaonya wajumbe wapya kuacha kuunda magenge kwani hayatawasaidia.

“Nasema hivi kutengeneza magenge ili fulani aharibikiwe ni jambo ambalo halina tija, unajitia kihoro bure. Uliyetaka aharibikiwe, hakuharibikiwa, kwa nini mnaenda kufanya biashara ambayo haina maana? Wekezeni kwenye kitu chenye maana, haya mambo ya kukaa vigenge wakati orodha yenyewe haipo ni kujisumbua. Lakini akili ni nywele na kila mtu ana zake,” alisisitiza.

Kikwete alisema wale wanaoingia kwa mara ya kwanza NEC wajishirikishe katika mambo ya kujenga na si kubomoa chama kwa kuwa unajipa kihoro hasa pale unapotaka mtu aharibikiwe na matokeo yake mtu huyo anafanikiwa zaidi.

"TUNAJUA BIASHARA YA DINI INALIPA , LAKINI MSIIVURUGE TANZANIA"...RAIS KIKWETE

Posted by Bigie habari za kitaifa, KIKWETE 3:50 PM

RAIS Jakaya Kikwete amesema kuwa mtindo wa kufanya fujo na kusababisha uvunjifu wa amani kwa visingizio vya dini nchini ni biashara inayolipa na ndiyo maana wakereketwa wa kufanya hivyo hawaishi.

Hata hivyo, akaonya kwamba Serikali katu haitawavumilia wanaotaka kuwavuruga Watanzania kwa kutumia dini zao.

Kikwete aliyasema hayo wakati wa kuwasilisha ripoti ya Mchakato wa Nchi za Afrika Kujitathmini zenyewe katika nyanja za Demokrasia, Utawala Bora na Uchumi (APRM) nchini Ethiopia mwishoni mwa wiki iliyopita.

Alisema ni jambo la kushangaza kuona kuwa wadau wanatumia dini kuiyumbisha nchi kwa vigezo kuwa ni miongoni mwa nchi zilizodumisha amani kwa muda mrefu.

Alisema kutokana na hali hiyo, Serikali yake haitayumba wala kusita kupambana ipasavyo na wafanya fujo hao ikiwa ni pamoja na kutumia njia za busara wakati wa kutoa uamuzi na hatua za kisheria.

“Kuna baadhi ya watu wanatumia vigezo vya kidini kwa ajili ya kufanya vurugu za kuhatarisha amani, Serikali haitaweza kuwavumilia, badala yake tutatumia njia mbalimbali ili kushughulikia matatizo hayo ikiwa ni pamoja na kutumia busara na hatua za kisheria,” alisema Kikwete.

Alisema mapendekezo yaliyotolewa na APRM ya kusimamia kwa uangalifu tofauti za kidini nchini ameyachukua kwa mikono miwili.

Alisema kitendo cha Tanzania kuwa na amani na utulivu kwa muda mrefu ni bahati iliyotokana na kutokuwapo kwa ugomvi wa kikabila, kidini ama yale ya kutokana na rangi za watu. Alisema hali hii inatokana na ukweli kuwa sera iliyopo haina ubaguzi kwa wananchi kwa misingi ya kabila, dini, rangi ama sehemu anakotoka Mtanzania, ni sera nzuri na wanaidumisha.

Kwa mujibu wa Kikwete, uzuri kuhusu dini katika Tanzania ni kwamba kila mmoja ana uhuru wa kuabudu na kwamba Serikali haina dini.

“Tunajua fika kuhusu hatari zinazoweza kusababishwa na baadhi ya wanasiasa na viongozi wa dini wenye malengo ya kuchochea fujo za kidini, hatuwezi kuyumba wala kusita kupambana ipasavyo na watu wa namna hiyo,” alibainisha.

Alisema ikiwa wataona uchochezi wa kidini unafikia kiwango cha kuhatarisha amani ya nchi ama uvunjifu wa amani na sheria na dola itachukua mkondo wake ili haki iweze kutendeka.

RAIS KIKWETE AONGOZA KUWA NA "FOLLOWERS" WENGI TWITTER IKILINGANISHWA NA WANASIASA WENGINE WA TANZANIA

Posted by Bigie habari za kitaifa, KIKWETE 1:50 AM

"SERIKALI HAITAVUMILIA TENA VURUGU ZOZOTE ZA KIDINI, KIKANDA AU KIKABILA:"...RAIS KIKWETE

Posted by Bigie habari za kitaifa, KIKWETE 1:58 AM

PICHA ZA RAIS KIKWETE ALIPOONGOZA MAZISHI YA SAJUKI LEO..

Posted by Bigie habari za kitaifa, KIKWETE, sajuki 6:40 AM

RAIS KIKWETE AMTUNUKU BI KIDUDE NISHANI YA SANAA NA MICHEZO

Posted by Bigie BI KIDUDE, habari za kitaifa, KIKWETE 12:31 AM

HAYA NDO MATOKEO YA UCHAGUZI MKUU WA CCM -NEC

Posted by Bigie ccm, habari za kitaifa, KIKWETE 7:13 PM

HAPPY BIRTHDAY MH. RAIS KIKWETE

Posted by Bigie habari za kitaifa, KIKWETE 2:07 AM

WALIO TOSWA NA RAIS KIKWETE NDIYO WAUMINI WA KIFO CHA CCM!

Posted by Bigie ccm, habari za kitaifa, KIKWETE 12:02 AM

YUMO MGEJA, LEMBELI, MKONO, BASHE, KINGWANGALLA, PREMJI.

-------------------------------------------------------------------

MOJAWAPO ya sifa kubwa atakayokumbukwa nayo Rais Jakaya Kikwete ambaye pia ni Mwenyekiti wa taifa wa Chama Cha Mapinduzi (CCM), ni kutoa kauli tata ambazo hubakia katika mjadala kwa muda mrefu.

Tofauti kidogo na kauli za hawali safari hii kauli yake imeondoka na vigogo wa chama hicho na kuwatupa nje ya kinyang’anyiro cha kuwania nafasi za uongozi wa jumuiya za chama na ujumbe wa Halmashauri Kuu ya Taifa (NEC).

Habari kutoka ndani ya NEC, ziliwataja walioenguliwa kuwa ni pamoja na Mbunge wa Nzega, Dk. Hamisi Kigwangalla na Mjumbe wa Baraza Kuu la Vijana la CCM Taifa (UVCCM), Hussein Bashe.

Mbali ya hao, hasira za mwenyekiti huyo wa chama tawala zimemwangukia Mwenyekiti wa CCM Mkoa wa Shinyanga, Khamis Mgeja na Mbunge wa Kahama, James Lembeli.

Wengine waliokumbwa na kadhia hiyo ni pamoja na Mbunge wa Kisesa, Luhaga Mpina na Mbunge wa Ludewa, Deo Filukunjombe. Wabunge hao ni miongoni mwa waliotia saini kutaka Waziri Mkuu Pinda ang’oke. Duru za siasa zinasema kuwa msimamo wa wabunge hao kuhusu Pinda, ndio ulisababisha wakatwe kuwania NEC.

Athari za saini za kutaka kumng’oa Pinda ambazo zilisababisha Baraza la Mawaziri lipanguliwe na kuundwa upya, zimeonekana pia kumgusa Mbunge wa Musoma Vijijini, Nimrod Mkono, ambaye ametupwa nje kuwania nafasi ya uenyekiti wa wazazi CCM taifa.

Hali ya mkosi bado inaendelea kumwandama Mbunge wa zamani wa Nyamagana, Antony Diallo na Mwenyekiti wa CCM Mkoa wa Mwanza aliyekuwa akitetea nafasi yake, Clement Mabina ambao nao majina yao yamengolewa.

Wakati vigogo hao wakiugulia machungu ya kutoswa, Rais Kikwete ametoa kauli nzito ambayo moja kwa moja inaonekana kuwalenga wahanga hao ya kutaka wagombea waliopata kutoa kauli za vitisho dhidi ya chama hicho kufanya kile walichokusudia kukifanya.

Akizungumza kwa ukali, Kikwete ambaye juzi alitamba akisema CCM haitakufa kama inavyotabiriwa na baadhi ya watu, alihitimisha kauli yake kwa kusema watu wenye kauli za namna hiyo walikuwa hawafai kuendelea kuwa wanachama wa chama hicho.

Alisema hivi sasa wagombea wengi wamekuwa wakijitokeza kuwania nafasi mbalimbali za uongozi ndani ya CCM na kung’ang’ania kupata ushindi kiasi cha wengine kufikia hatua ya kutoa kauli za vitisho kwa kusema wasipopata nafasi ‘patachimbika’.

“Inashangaza kuona kugombea NEC tu watu wanataka kuuana, wanakimbilia nini huko ndani?” alihoji Rais Kikwete.

“Ina maana watu hawa wanaonyesha dhahiri kuwa hawana nia njema na chama, bali wanaingia kwa maslahi yao binafsi, hivyo tuna kila sababu ya kuwakataa ili tujenge timu ya ushindi ambayo ndiyo nia yetu,” aliongeza mwenyekiti huyo.

Rais Kikwete alisema kama kuna wagombea ambao watajitoa ndani ya CCM na kuhamia chama kingine kutokana na majina yao kutopendekezwa, wajitoe.

“Hatuchagui wagombea wenye ndimi mbili ambao wanasema kama hatutapitishwa tutahamia chama kingine, hao tunawatakia kila la heri waende tu, kwani hawana nia njema na chama hiki,” alisema.

Mwenyekiti huyo ambaye alikuwa akizungumza kwa ukali, alisema anajua suala la kuwaengua baadhi ya wagombea litazua mjadala, lakini nia ya chama ni njema katika kuleta sura mpya na uhai.

“Kufanya hivyo ni pamoja na kupata viongozi watakaokiletea chama ushindi katika chaguzi za Serikali za Mitaa 2014 pamoja na Uchaguzi Mkuu mwaka 2015, hivyo lazima watu hao watambue kuwa kazi wanayoifanya ni kuunda timu ya ushindi wa chama na si wa watu.

“Najua kuna ndugu na marafiki ambao hawatateuliwa kutokana na kujaa kwa nafasi na mapungufu na madhaifu ambayo yalionekana baada ya Kamati ya Maadili kupitia majina yao, hivyo wasione kama wameonewa bali wajue kama ndio utaratibu wa chama wa kuhitaji viongozi shupavu, hodari na mwenye uwezo wa kukitetea na kukipigania chama na kukipa ushindi,” alisema Rais Kikwete.

Aliwatahadharisha wagombea watakaotumia rushwa kwenye kampeni zao watambue kuwa Taasisi ya Kuzuia na Kupambana na Rushwa (TAKUKURU) wanafanya kazi yao muda wote, hivyo atakayekamatwa asije akamlaumu mtu.

RAIS KIKWETE AKANA KUMUUZIA GEORGE BUSH ENEO LA KIGAMBONI

Posted by Bigie habari za kitaifa, KIKWETE 9:01 AM

Rais wa Jamhuri ya Muungano wa Tanzania, Mheshimiwa Jakaya Mrisho Kikwete leo, Alhamisi, Septemba 20, 2012, ameweka Jiwe la Msingi la ujenzi wa Daraja la Kigamboni, Dar es Salaam kwa kuwaonya watu ambao amewaeleza kuwa wanavyo viwanda vya kutunga uongo kuacha tabia hiyo na kuelekeza nguvu kwenye maendeleo.

Aidha, Rais Kikwete amewahakikishia wakazi wote wa Kigamboni ambao wanaondolewa katika maeneo yao kwa ajili ya kupisha ujenzi wa daraja hilo na ujenzi wa Mji Mpya wa Kigamboni kuwa watalipwa stahili na haki zao zote.

Daraja hilo la Kigamboni ambalo wazo la kujengwa kwake lilibuniwa kwa mara ya kwanza zaidi ya miaka 30, tokea mwaka 1978, wakati wa uongozi wa Baba wa Taifa, Mwalimu Julius Nyerere, linajengwa kwa gharama ya Sh. bilioni 214.6 na litakuwa tayari katika muda wa miezi 36 ijayo, ingawa muda huo unaweza kupungua na kubakia miezi 30.

Daraja hilo ambalo litakuwa na urefu wa mita 680 linagharimiwa kwa pamoja na Serikali na Shirika la Hifadhi ya Jamii la NSSF ambalo litachangia kiasi cha asilimia 60 na Serikali asilimia 40.

Daraja hilo ambalo litakuwa na jumla ya barabara za kupitisha magari sita kwa wakati mmoja linajengwa na makampuni mawili ya China ambayo ni China Railway Construction Engineering Group na China Railway Major Bridge Engineering Company na mhandisi msimamizi wa ujenzi huo ni Kampuni ya Misri.

Daraja hilo litapunguza adha ya usafiri kati ya Kigamboni na Dar es Salaam ambao kwa sasa unategemea vivuko, ama boti ndogo, mitumbwi ama wenye magari kulazimika kufanya mzungumo wa kilomita 52. Kwa uamuzi wa sasa, wavuka kwa miguu ambao watakuwa na njia maalum kwenye daraja hilo pamoja na waendesha baiskeli watavuka bure bila malipo yoyote.

Akizungumza kwenye sherehe hiyo, Rais Kikwete amesema kuwa Serikali haiwezi kudhulumu wananchi wake na hivyo watu wote ambao wanastahili fidia kutokana na ujenzi wa daraja hilo na mji mpya wa Kigamboni watalipwa haki na stahiki zao.
Aidha, Rais Kikwete amesema kuwa Serikali yake haitaruhusu mtu yoyote kuzuia ama kuchelewesha miradi ya maendeleo ambayo inalenga kunufaisha watu wengi.

Rais Kikwete pia amewaonya watu ambao wamelifanya suala la kutunga na kusema uongo kama sehemu ya utamaduni wao. “Watu wana viwanda vya kuzalisha uongo. Wanashinda wanasambaza uongo kwenye mitandao, kila mahali. Wamepata hata kusema kuwa mimi nimemuuzia George Bush eneo la Kigamboni. Bush aje kufanya nini Kigamboni?”

Rais pia amesema kuwa wapo watu ambao hawapendi maendeleo ya nchi. “Wanatamani kila siku tushindwe kuwaletea wananchi maendeleo. Lakini watakufa kwa kihoro kwa sababu hatutashindwa. Kila tulilosema tutalifanya, litafanyika”.

Amesema kuwa thamani kubwa ya vyama vya siasa ni maendeleo ya wananchi. “Lakini wapo wenzetu ambao wanaudhika wakiona maendeleo. Wanapenda hata daraja hili lisijengwe. Leo hawatalala usingizi. Kazi ya vyama vya siasa ni kuweka maslahi yetu sote mbele.”

Imetolewa na:
Kurugenzi ya Mawasiliano ya Rais,
Ikulu.
Dar es Salaam.
20 Septemba, 2012

PICHA ZA MUHESHIMIWA RAIS AKITANGAZA BARAZA LA MAWAZIRI MUDA MCHACHE ULIO PITA

Posted by Bigie BARAZA JIPYA LA MAWAZIRI, KIKWETE 8:26 AM

BREAKING NEWSSS: RAIS KIKWETE ATANGAZA BARAZA JIPYA LA MAWAZIRI

Posted by Bigie BARAZA JIPYA LA MAWAZIRI, KIKWETE, WAZIRI MKUUI 7:17 AM

Rais wa Jamhuri ya Muungao ya Tanzania Dk Jakaya Kikwete ametangaza baraza jipya la mawaziri kupitia Runinga ya Shirika la Utangazaji la Taifa TBC.....

Yafuatayo ni majina ya Mawaziri hao walioteuliwa pamoja na Manaibu Waziri:...

ORODHA YA MAWAZIRI NA NAIBU MAWAZIRI

MAWAZIRI

1.            OFISI YA RAIS

Waziri wa Nchi, Ofisi ya Rais (Mahusiano na Uratibu)Ndugu Stephen M. Wasira, Mb.,

Waziri wa Nchi, Ofisi ya Rais, (Utawala Bora)Ndugu George Mkuchika, Mb.,

Waziri wa Nchi, Ofisi ya Rais (UTUMISHI)Ndugu Celina Kombani, Mb.,

2.            OFISI YA MAKAMU WA RAIS

Waziri wa Nchi, Ofisi ya Makamu wa Rais (MUUNGANO)Ndugu Samia H. Suluhu, Mb.,

Waziri wa Nchi, Ofisi ya Makamu wa Rais (MAZINGIRA)Dr. Terezya P.L. Huvisa, Mb.,

3.            OFISI YA WAZIRI MKUU

Waziri wa Nchi, Ofisi ya Waziri Mkuu (Uwekezaji na Uwezeshaji)Ndugu Mary M. Nagu, Mb.,

Waziri wa Nchi, Ofisi ya Waziri Mkuu (TAMISEMI)Ndugu Hawa Ghasia, Mb.,

Waziri wa Nchi, Ofisi ya Waziri Mkuu (Sera, Uratibu na Bunge)Ndugu William V. Lukuvi, Mb.,

4.            WIZARA

Waziri wa Ushirikiano wa Afrika MasharikiNdugu Samuel J. Sitta, Mb.,

Waziri wa Ulinzi na Jeshi la Kujenga Taifa Ndugu Shamsi Vuai Nahodha, Mb.,

Waziri wa UjenziDr. John P. Magufuli, Mb.,

Waziri wa Afya na Ustawi wa Jamii Dr. Hussein A.H. Mwinyi, Mb.,

Waziri wa Elimu na Mafunzo ya UfundiDr. Shukuru J. Kawambwa, Mb.,

Waziri wa Maendeleo ya Jamii, Jinsia na WatotoNdugu Sophia M. Simba, Mb.,

Waziri wa Mambo ya Nje na Ushirikiano wa KimataifaNdugu Bernard K. Membe, Mb.,

Waziri wa Katiba na Sheria Ndugu Mathias M. Chikawe, Mb.,

Waziri wa Mambo ya Ndani ya NchiNdugu Emmanuel Nchimbi, Mb.,

Waziri wa Maendeleo ya Mifugo na UvuviDr. David M. David, Mb.,

Waziri wa Kazi na Ajira Ndugu Gaudentia M. Kabaka, Mb.,

Waziri wa Mawasiliano, Sayansi na TeknolojiaProf. Makame M. Mbarawa, Mb.,

Waziri wa Ardhi, Nyumba na Maendeleo ya Makazi Prof. Anna K. Tibaijuka, Mb.,

Waziri wa MajiProf. Jumanne Maghembe,  Mb.,

Waziri asiyekuwa na Wizara MaalumProf. Mark Mwandosya, Mb.,

Waziri wa Kilimo, Chakula na UshirikaEng. Christopher Chiza, Mb.,

Waziri wa Uchukuzi Dr. Harrison Mwakyembe, Mb.,

Waziri wa Habari, Vijana, Utamaduni na MichezoDr. Fenella E. Mukangara, Mb.,

Waziri wa Maliasili na UtaliiNdugu Khamis Kagasheki, Mb.,

Waziri wa Viwanda na Biashara Dr. Abdallah O. Kigoda, Mb.,

Waziri wa Fedha Dr. William Mgimwa, Mb.,

Waziri wa Nishati na MadiniProf. Sospeter Muhongo, Mb.,

5.            NAIBU MAWAZIRI

OFISI YA RAIS

HAKUNA NAIBU WAZIRI

6.            OFISI YA MAKAMU WA RAIS

Naibu Waziri, Ofisi ya Makamu wa RaisNdugu Charles Kitwanga, Mb.,

7.            OFISI YA WAZIRI MKUU

Naibu Waziri wa Nchi, Ofisi ya Waziri Mkuu (TAMISEMI)Ndugu Majaliwa K. Majaliwa, Mb.,

Naibu Waziri wa Nchi, Ofisi ya Waziri Mkuu (TAMISEMI)Ndugu Aggrey Mwanry, Mb.,

8.            WIZARA MBALIMBALI

Naibu Waziri wa Kazi na AjiraDr. Makongoro M. Mahanga, Mb.,

Naibu Waziri wa Kilimo, Chakula na UshirikaNdugu Adam Malima, Mb.,

Naibu Waziri wa Mambo ya Ndani ya NchiNdugu Pereira A. Silima, Mb.,

Naibu Waziri wa Viwanda na BiasharaNdugu Gregory G. Teu, Mb.,

Naibu Waziri wa Maendeleo ya Mifugo na UvuviNdugu Benedict N. Ole-Nangoro, Mb.,

Naibu Waziri wa Mambo ya Nje na Ushirikiano wa KimataifaNdugu Mahadhi J. Maalim, Mb.,

Naibu Waziri wa Ardhi, Nyumba na Maendeleo ya Makazi,Ndugu Goodluck J. Ole-Medeye, Mb.,

Naibu Waziri wa Maendeleo ya Jamii, Jinsia na Watoto Ndugu Ummy A. Mwalimu, Mb.,

Naibu Waziri wa Elimu na Mafunzo ya Ufundi Ndugu Philipo A. Mulugo, Mb.,

Naibu Waziri wa Ushirikiano wa Afrika Mashariki Dr. Abdulla Juma Abdulla, Mb.,

Naibu Waziri wa Maliasili na UtaliiNdugu Lazaro Nyalandu, Mb.,

Naibu Waziri wa UjenziNdugu Gerson Lwenge, Mb.,

Naibu Waziri wa Afya na Ustawi wa Jamii,Dr. Seif Suleiman Rashid, Mb.,

Naibu Waziri wa Nishati na MadiniNdugu George Simbachawene, Mb.,

Naibu Waziri wa Mawasiliano, Sayansi na Teknolojia Ndugu January Makamba, Mb.,

Naibu Waziri wa UchukuziDr. Charles J. Tizeba, Mb.,

Naibu Waziri wa Habari, Vijana, Utamaduni na MichezoNdugu Amos Makala, Mb.,

Naibu Waziri wa MajiEng. Dr. Binilith Mahenge, Mb.,

Naibu Waziri Nishati na Madini Ndugu Stephen Maselle, Mb.,

Naibu Waziri wa Katiba na SheriaNdugu Angela Jasmine Kairuki, Mb.,

Naibu Waziri wa FedhaNdugu Janet Mbene, Mb.,

Naibu Waziri wa FedhaNdugu Saada Mkuya Salum, Mb.,